Гэрээ байгуулах бэлтгэл шатанд буюу гэрээ байгуулахтай холбоотойгоор гарах зардал, хийгдэх ажил, талуудын үндсэн зорилго, ажлын хүрээг тохиролцох, мэдээллийн нууцлал зэрэг асуудлыг харилцан тохиролцох шаардлага үүсдэг. Ялангуяа урт хугацаанд хэрэгжих, ач холбогдол өндөртэй хэлэлцээрийн үед түгээмэл тохиолддог. Талууд эдгээр асуудлыг урьдчилсан хэлэлцээрийн шатанд “Харилцан ойлголцлын санамж бичиг” байгуулах замаар тохиролцох боломжтой.

Санамж бичигт талуудын нэгдмэл зорилго, уг зорилгод хүрэхийн тулд гүйцэтгэвэл зохих ажлын чиглэл, хүрээ, гэрээ байгуулах эцсийн хугацаа, зардлын хэмжээ, хариуцах этгээд, хамтран хэрэгжүүлэх төслийн эдийн засаг, техник технологийн судалгаа явуулах нөхцөл зэргийг тодорхойлж өгөх ба дараагийн шатанд хамтран ажиллах нөхцөл болно. Хэдий санамж бичигт дурдсан тохиролцоонууд нь заавал дагаж мөрдөх үүрэг хүлээлгэхгүй сайн дурын шинжтэй боловч талууд харилцан тохиролцон бие биенийхээ өмнө тодорхой амлалт өгөх боломжтой. Тухайлбал:

Мэдээллийн нууцыг задруулахгүй байх;Гуравдагч этгээдтэй зэрэгцээ хэлэлцээ хийхгүй байх;Тодорхой хугацаанд харилцан өрсөлдөхгүй байх;Тохиролцоонд хүрэх эцсийн хугацаа;Санамж бичгийн асуудлаар маргаан гарсан тохиолдолд хэрэглэх хууль, шийдвэрлэх арга зам зэрэг байж болно.

Хэдийгээр санамж бичиг нь талуудад хууль зүйн хувьд заавал биелүүлэх үүрэг ногдуулахгүй ч цаашдын хэлэлцээрийг үр нөлөөтэй явуулах, үйл явцыг хянах, үндэслэлтэй шийдэл олох, эрсдэлийг тооцох, улмаар нэгдмэл тохиролцоонд чөлөөтэй хүрэх нөхцөлийг хангах ач холбогдолтой.